20 İyul 2024

Tovuzda qaçırılan 13 yaşlı qız ailəsinə təhvil verilib

Tovuzdan ailə qurmaq məqsədilə Xaçmaza qaçan 13 yaşlı qız ailəsinə təhvil verilib.

APA-nın əldə etdiyi xəbərə görə, 2010-cu il təvəllüdlü Ə.Tağıyeva polis əməkdaşları tərəfindən Xaçmazda valideynlərinə təqdim olunub.

DİN-in Mətbuat xidmətinin Quba regional qrupundan APA-ya bildirilib ki, ailə üzvləri azyaşlını evlərinə aparmaq üçün Xaçmaza gəlib. Cinayət işi üzrə azyaşlının ifadəsi alınıb və müvafiq ekspertizalar təyin olunub.

Qeyd edək ki, mayın 20-də Tovuzda 13 yaşlı qızın itkin düşməsi barədə məlumat yayılıb. 2010-cu il təvəllüdlü Ə.Tağıyevanın yaşadığı evdən çıxıb naməlum istiqamətə gedərək itkin düşdüyü açıqlanıb. Sonradan onun ailə qurmaq məqsədilə öz istəyi ilə Xaçmaz rayonuna getdiyi bildirilib. Polisin keçirdiyi axtarış tədbirləri nəticəsində rayon sakini Ə.Tağıyevanın yeri Xaçmaz rayonunda müəyyənləşdirilib. Onun qaçdığı şəxs polis əməkdaşları tərəfindən saxlanılıb.

Ə. Tağıyevanın Xaçmaz rayonuna ailə qurmaq məqsədilə ilə qaçması ilə əlaqədar saxlanılan S. Kavazov barəsində cinayət işi başlanılıb.

Araşdırmalar davam etdirilir.

APA-nın əldə etdiyi xəbərə görə, saxlanılan şəxsin 44 yaşı var. Onun ilk nikahından övladlarının olduğu bildirilir.