Birləşmiş Ərəb Əmirliklərinin ilk qadın astronavtı – 4 min insanın arasından seçilən 27 yaşlı gəncin UĞUR HEKAYƏSİ
27 yaşlı Nora əl-Matroushi Məhəmməd əl-Mulla ilə kosmik proqram üçün seçiliblər. Bu haqda məlumatı Dubay Əmirliyinin hakimi Şeyx Məhəmməd bin Rəşid əl-Maktum Twitter-də paylaşıb.
Şeyx Məhəmməd öz tvitində Nora əl-Matroushi və Məhəmməd əl-Mullanın Birləşmiş Ərəb Əmirliklərinin kosmik proqramına qatılan 4000 namizəd arasından seçildiyini bildirib. Şeyx Məhəmməd, “Ölkəmizi təbrik edirik. BƏƏ-nin adını göylərə daşımaqlarına inanırıq”,- deyə paylaşım edib.
Nora əl-Matroushi də bu mövzuda paylaşım edərək öz fikirlərini bildirib: “Millətim bu gün mənə unudulmaz anlar bəxş etdi. Xalqımızın yaddaşında həkk olunacaq tarixi anlar və nailiyyətlər qazanmaq üçün çox çalışmağı hədəfləyirəm”.
Bundan əlavə astronavt Nora əl-Matroushi Birləşmiş Ərəb Əmirlikləri Universitetinin Maşın mühəndisliyi bölməsinin məzunudur və Milli Neft İnşaat Şirkətində mühəndis vəzifəsində çalışır. Gənc astronavt kosmosa olan məhəbbətinin gənc yaşlarından başladığını da qeyd edib. Astronavtın gözəl yaşamaq üçün devizi isə budur: “Sizi xoşbəxt edə biləcək hər şeyi edin”.
Nora əl-Matroushinin kosmosa birgə səyahət edəcəyi yol yoldaşı Məhəmməd əl-Mulla isə pilotdur. Dubay polisi üçün aviator işləyir və eyni zamanda təlim bölməsinə rəhbərlik edir.
“The National” qəzetinin hesabatına görə, bu hadisə bəzi kosmik agentliklərin 1960-cı illərdən bəri kişilərin üstünlük təşkil etdiyi kosmik sənayedə gender bərabərliyini artırmaq üçün müsbət addımların atılmasının göstəricisidir.
4 min namizəd arasından seçilən ikili Texasın Houston şəhərindəki NASA-nın Johnson kosmik mərkəzində təlimlərə başlayacaq. Birləşmiş Ərəb Əmirlikləri hökumətinə görə Nora əl-Matroushi gələcəkdə bu missiyada iştirak edən ilk ərəb qadın astronavt olacaq.
