SOCAR-ın yanacaqdoldurma məntəqəsində tingpaylama aksiyası keçirilib – FOTO
Dövlət Neft Şirkətinin (SOCAR) yanacaq-doldurma məntəqələrindən (YDM) birində “Bir ağac – min nəfəs” devizi altında tingpaylama aksiyası keçirilib.
Bu barədə “Report”a SOCAR-ın törəmə müəssisəsi – “SOCAR PETROLEUM” QSC-dən bildirilib.
Xatırladaq ki, şirkətin Ekologiya və Təbii Sərvətlər Nazirliyi ilə birgə reallaşdırdığı aksiyanın məqsədi ağac əkmək istəyən hər kəsi tinglərlə pulsuz təmin etməklə onlara dəstək olmaq, təbiətə töhfə verməkdir.
Layihənin davamı olaraq, bu gün Bakının Binəqədi rayonunda – Binəqədi-Novxanı yolunda fəaliyyət göstərən YDM-in ərazisində vətəndaşlara ağac tingləri paylanılıb. Aksiyada, həmçinin ekokönüllülər vətəndaşlara ağac tinglərinin əkilməsi və onlara qulluq göstərilməsi qaydalarına dair məlumatlar verib.
Aksiya bundan əvvəl “SOCAR PETROLEUM”un Heydər Əliyev prospektində yerləşən yanacaqdoldurma məntəqəsində keçirilib. Aksiyada paylanılan ağac tingləri ETSN-in sahələrində yetişdirilir.
