Bərdədə“Şuşa İli”nə həsr olunmuş muğam festivalının birinci turu keçirilib
Media1. az-ın xəbərinə görə, Bərdə Rayon Mədəniyyət Mərkəzində regional idarənin tabeliyində olan uşaq musiqi və incəsənət məktəblərinin şagirdlərinin iştirakı ilə “Şuşa İli”nə həsr olunmuş muğam festivalının birinci turu keçirilib.
Bərdə Regional Mədəniyyət İdarəsinin rəisi Vəsilə Möhsümova çıxış edərək festival iştirakçılarına uğurlar arzulayıb, onlara festivalının əhəmiyyətindən, milli musiqimizin zənginliyindən geniş söz açıb.
Qeyd edib ki, festivalın keçirilməsində məqsəd 2008-ci ildə YUNEKO-nun qeyri-maddi mədəni irs üzrə Reprezentativ Siyahısına daxil edilmiş Azərbaycan muğam ənənələrinin və milli dəyərlərimizin yaşadılması və təbliği, uşaq musiqi və incəsənət məktəblərində xanəndəlik ixtisası üzrə musiqi təhsilinin inkişaf etdirilməsi, istedadlı uşaq və gənclərin aşkara çıxarılması və dəstəklənməsidir.
2022 – ci il 19-20 may tarixlərində Bərdə rayon Mədəniyyət Mərkəzində Azərbaycan Respublikası Mədəniyyət Nazirliyi tərəfindən regional idarənin tabeliyində olan uşaq musiqi və incəsənət məktəblərinin şagirdlərinin iştirakı ilə muğam festivalının Bərdə Regional Mədəniyyət İdarəsi üzrə I mərhələsi keçirilmişdir.
Festival 2 mərhələdən(I mərhələ regionlar üzrə və II mərhələ final mərhələsi) ibarət olmaqla 2 yaş qrupu(I qrup: 9-12 yaş, II qrup: 13-17 yaş) üzrə keçirilir. Birinci mərhələdə idarələr tərəfindən yaradılmış münsiflər heyəti festivala qatılmış məktəblərin şagirdlərinin seçimini aparır.
Regionlar üzrə mərhələdə 1-ci yerlərin qalibləri II mərhələdə iştirak etmək hüququ qazanırlar.
Bərdə Regional Mədəniyyət İdarəsinin tabeliyində olan məktəblər üzrə muğam festivalında iştirak edən şagirdlərdən 18 nəfər II mərhələyə vəsiqə qazanmışdır.
Müsabiqənin növbəti mərhələsi Bakı şəhər Qara Qarayev adına Mərkəzi İncəsənət Məktəbində keçiriləcəkdir.
