Yevlaxda idman və mahnı bayramı keçirilib FOTO

Yevlaxda Ulu Öndər Heydər Əliyevin anadan olmasının 99-cu ildönümü münasibətilə keçirilən silsilə tədbirlər davam edir. 

“İki sahil” xəbər verir ki,  Yevlax Şəhər İcra Hakimiyyətinin, YAP Yevlax rayon təşkilatının, Gənclər və İdman İdarəsinin, “Gənclər evi” SXM-in və Yevlax Mədəniyyət Mərkəzinin birgə təşkilatçılığı ilə  5 may 2022-ci il tarixdə keçirlən “İdman və Musiqi Bayramı” adlı  tədbir şəhərin Dədə Qorqud Parkında düzənlənib.

Tədbirdə mədəniyyət və incəsənət ustalarının, məktəblilərin ifasında  Azərbaycana, Ümummilli Liderə, Ali Baş Komandan cənab İlham Əliyevə həsr olunan mahnılar səsləndirilmiş, milli rəqslər nümayiş etdirilmişdir. Məktəblilərin, baxça uşaqlarının əl işlərindən ibarət təşkil olunan sərgi tədbir iştirakçıları tərəfindən maraqla qarşılanmışdır. Gənc rəssamlar və “Bacarıqlı Əllər” dərnəyinin üzvləri tədbir iştirakçılarına Azərbaycan xalqının Ümummilli Lideri Heydər Əliyevin şərəfli ömür yolu və onun ölkəmizin tərəqqisi uğrunda göstərdiyi çoxsaylı xidmətləri özündə əks etdirən rəsm və əl işləri haqqında  ətraflı məlumat verdilər.

Park boyunca müxtəlif yerlərdə idmanın şahmat, taekvando, cüdo, mini futbol və ağır atletika növləri üzrə yeniyetmə və gənc idmançılar  öz idman bacarıqlarını sərgiləmiş, könüllülərdən ibarət təşkil olunmuş rəqs qrupları milli və dünya  rəqs nömrələrini nümayiş etdirmişlər. 

İki saata qədər davam edən tədbir yevlaxlılar və şəhərə gələn qonaqlar tərəfindən böyük coşqu və rəğbətlə qarşılanıb.