Meksika mətbuatında erməni yalanları ifşa edilib
Meksikanın nüfuzlu KİV-lərindən olan “ContraReplica” qəzetində səfir Məmməd Talıbovun Ermənistanın keçmiş münaqişə ərzində törətdiyi müharibə cinayətləri, hazırda Cənubi Qafqazda gərginliyin artmasına səbəb olan təxribatçı addımları, regionun yeni reallıqları, burada Azərbaycan tərəfindən görülən işlər və bölgədə davamlı sülhün əsas şərtləri barədə məqaləsi dərc olunub.
Azərbaycanın Meksikadakı səfirliyindən “İki sahil”ə verilən məlumata görə, yazıda ilk olaraq, Ermənistanın 30 illik işğal dövründə törətdiyi müharibə və insanlıq əleyhinə cinayətləri, habelə 44 günlük müharibə zamanı münaqişə zonasından kənarda yerləşən şəhərləri ballistik raket hücumlarına məruz qoyaraq mülki soydaşlarımız arasında çoxsaylı tələfata səbəb olması, eləcə də işğaldan azad olunmuş ərazilərdə müşahidə olunan erməni vandalizmi, burada aparılmış kütləvi minalama və törətdiyi fəsadlar haqda məlumat verilir.
Sonra bölgədə periodik olaraq özünü büruzə verən gərginliyin səbəbinin Ermənistanın hərbi-siyasi rəhbərliyinin atdığı addımlar, bu xüsusda bu ölkənin keçmiş müdafiə nazirinin Rusiya sülhməramlı qüvvələrinin müvəqqəti yerləşdirildiyi Azərbaycan ərazilərinə qanunsuz səfəri, Ermənistan silahlı qüvvələrinin 60-a yaxın hərbi qulluqçusunun Azərbaycan ordusunun Laçın ərazisindəki mövqelərinə aparan yolda cəmləşməsi, Laçın və Kəlbəcərdəki mövqelərimizin intensiv atəşə tutulması kimi hallar olduğu bildirilir.
Buna baxmayaraq, Azərbaycanın üçtərəfli bəyanatlardan irəli gələn tələblərə sadiq qaldığı, hazırda bütün səylərini bölgənin yenidən qurulmasına, nəqliyyat yollarının və kommunikasiya xətlərinin bərpa edilməsinə və bölgənin hərtərəfli inkişafına yönəltdiyi vurğulanır.
Yazıda, həmçinin Ermənistan tərəfinin destruktiv ritorikasının başlıca elementlərindən olan “hərbi əsirlər” məsələsinə də fikir bildirilərək, Azərbaycan tərəfindən həbs edilmiş erməni əsilli şəxslərin 2020-ci il 10 noyabr bəyanatından sonra Azərbaycan ərazisinə keçərək burada terror aktları törətməyə cəhd etdikləri, bu səbəbdən onların hərbi əsir deyil, terrorçu olduqları və hazırda Azərbaycanın aidiyyəti orqanları tərəfindən məsuliyyətə cəlb edildikləri, bununla belə, xoş niyyət göstəricisi olaraq sözügedən şəxslərdən cinayətkar əməllərdə birbaşa olaraq iştirak etməmiş olanların azadlığa buraxıldığı söylənilir.
Sonda Azərbaycanın sərhədlərin demarkasiya və delimitasiyası işinin başlanması və yekun sülh müqaviləsinin işlənib hazırlanmasına dair Ermənistana dəfələrlə müraciətlər etsə də, bu günədək heç bir müsbət cavab almadığı deyilir və bölgədə davamlı sülhə nail olunması üçün Ermənistanın qonşularına qarşı ərazi iddialarından əl çəkməli, Azərbaycanın ərazi bütövlüyünü tanımalı, xalqını barışığa hazırlamalı və region ölkələri ilə mehriban qonşuluq şəraitində yaşamağı öyrənməli olduğu bildirilir.
