“Azəriqaz” rəhbərliyi Cocuqmərcanlıya səfər etdi.
Aprel döyüşlərinin ildönümü ərəfəsində “Azəriqaz” İB-nin baş direktorunun müavini Ceyhun Şıxəliyev, Birlik əməkdaşları, həmçinin Birlik yanında yaradılan İctimai Şuranın sədri Elçin Salmanov və Şura üzvləri Zaur Quliyev, Zülfüqar Hüseynzadə, Eyyub Hüseynov, Şaban Nəsirov Cəbrayıl rayonunun Cocuq Mərcanlı kəndinə səfər ediblər.
Media1.az 102info.aza istinadən xəbər verir ki, nümayəndə heyəti ilk öncə Füzuli rayonunun Horadiz qəsəbəsində yerləşən Aprel şəhidlərinin xatirə kompleksini ziyarət edib.
Tədbir iştirakçıları daha sonra Cocuq Mərcanlı kənd sakinləri ilə görüş keçiriblər.Görüş zamanı kənddə yaradılan, ancaq hazırda bərbad hala düşən TİKA-nın əvəzsiz olaraq qurub kəndlilərin ixtiyarına verdiyi istixanalar diqqəti cəlb edib. Sakinlər qazla təmin olunmadığından istixanalardan səmərəli istifadə edə bilmədiklərini deyiblər. Nəticədə istixanalardan istifadəyə maraq ölüb. İstixanaların istismarı baxımsız qalıb. Ancaq Cocuqmərcanlılar istixanalara qaz verilsə yenidən dağılmış qurğuları bərpa edə biləcəklərini bildiriblər. Azəriqaz rəhbərliyi Cocuqmərcanlılara köməklik göstərilməsini mümkün sayıblar.
Bildirilib ki, 2016-cı ildə aprel döyüşlərində Lələtəpə yüksəkliyi düşmən tapdağından azad edildikdən sonra ölkə başçısının müvafiq sərəncamına əsasən Cocuqmərcanlı kəndində yeni yaşayış kompleksi salınıb.
Respublikamızın müxtəlif şəhər və rayonlarında məskunlaşan Cəbrayıl rayon kənd sakinləri buraya köçürülüb. Kənd sakinləri üçün bütün şərait yaradılıb, həmçinin qəsəbə təbii qazla da təmin olunub. Görüş zamanı sakinlər yaradılan şəraitə görə dövlət başçısına öz minnətdarlıqlarını bildiriblər. Həmçinin nümayəndə heyəti Cocuq Mərcanlı kənd orta məktəbində olub və yeni inşa edilən Cocuq Mərcanlı məscidini də ziyarət ediblər. Daha sonra isə tədbir iştirakçıları övladı şəhid olan Birlik əməkdaşının ailəsini ziyarət edib, onların qayğıları ilə maraqlanıblar.
Həmçinin Biləsuvar rayonunda Birlik rəhbərliyi və Şura üzvləri yeni yaşayış massivinin qazlaşdırılması ilə bağlı İctimai Şuraya müraciət edən vətəndaşlarla da görüş keçiriblər. Qazlaşma zəruriyyəti araşdırılıb və bildirilib ki, yaxın zamanda Şura tərəfindən Birliyə massivin qazlaşdırılması ilə bağlı müraciət olunacaq.
