Azərbaycan könüllüləri növbəti beynəlxalq tədbirdə ölkəmizi uğurla təmsil edib

5 dekabr Beynəlxalq Könüllülər Günü münasibətilə Moskva şəhərində keçirilən “Biz Birlikdəyik” Beynəlxalq Vətəndaş Həmrəylik Forumunda iştirak edən “Biganə qalma!” komandası “Vətəndaş qatqısı” nominasiyasında dünya miqyaslı “#Wearetogether” və “İlin könüllülüyü” mükafatlarına layiq görülüblər. Mükafat komandanın rəhbəri Adil Abdullayevə təqdim edilib.

Qeyd edək ki, “Biganə qalma!” komandası 2020-ci il “Könüllülər ili”ndə Azərbaycan Könüllü Təşkilatları İttifaqı tərəfindən “Sosial Könüllülük” nominasiyası üzrə “İlin könüllülüyü” mükafatına layiq görülüb. Belə ki, komanda pandemiya dövründə ehtiyacı olan 6000-dən çox ailəyə xeyriyyə məqsədilə ərzaq yardımları edib.

Bundan əlavə, Forum çərçivəsində müsabiqəyə qəbul edilmiş layihələrin qiymətləndirilməsi üzrə regional ekspert qismində iştirak edən Azərbaycan Könüllü Təşkilatları İttifaqının idarə heyətinin üzvü, Formula 1 könüllülərinin koordinatoru Tural Hümbətov tərəfindən “Azərbaycanda könüllülük”, “Könüllülər üçün yaradılan imkanlar” və “Könüllülərin inkişafı” mövzularında, eləcə də İttifaqın fəaliyyəti ilə bağlı təqdimatlar keçirilib və Forum iştirakçıları ölkəmizdə formalaşmış könüllülük modeli haqqında ətraflı məlumat əldə ediblər.