Separatçı “ordu” ləğv edilir: “Razılaşma var” – Abramyan
Qarabağın dağlıq hissəsindəki separatçı ordunun ləğvi məsələsi yenidən gündəmə gətirilir.
Musavat.com teleqraf.com-a istinadən bildirir ki, bu barədə Ermənistan parlamentinin deputatı Tiqar Abramyanın açıqlamasında deyilib.
Onun sözlərinə görə, məsələ əvvəllər Azərbaycanın təşəbbüsü və tələbi ilə həyata keçirilirdisə, indi həm Ermənistan hökuməti, həm də separatçı rejimin özü tərəfindən aktivləşdirilir və müzakirə olunur.
Abramyan bildirib ki, separatçı qüvvələrin tam ixtisarı beynəlxalq və ya Qarabağın dağlıq hissəsindəki Rusiya sülhməramlılarının zəmanəti kontekstində gündəmə gətirilir.
“Burada birinci problem ondan ibarətdir ki, Ermənistan hökuməti bu mövzunu gündəmin müzakirə, daha dəqiq desək, sövdələşmə mövzusuna çevirib”, – deputat vurğulayıb.
O, bu məsələnin Ermənistan hökuməti və Xankəndindəki separatçı rejim arasında razılaşdırıldığını iddia edib.
Abramyan “müdafiə ordusu”nun bölgədəki qondarma respublikanın “sonuncu istinad divarı” olduğunu və bunun da dağıdılmasına başlanılacağını söyləyib.
