Narkomaniya ümumbəşəri bəladır
![](https://media1.az/wp-content/uploads/2022/12/b05b57f6159384623343963485710143970.jpg)
Qəbələdə narkomanlığa və narkoticarətə qarşı ciddi tədbirlər həyata keçirilir
Narkomaniya «ağ ölüm»dür, həyatdan üz çevirməkdir. «Narkomaniya» və «ölüm» sözləri bu gün insanların təsəvvüründə sinonim sözlərə çevrilib. Müasir dövrümüzdə insanlıq üçün böyük bəla olan narkomaniya bütün dünyada geniş yayılmışdır. Narkotik maddə alverçiləri uşaqların çox olduğu yerlərdə peyda olur, onlara həmin məhsulları təklif edirlər. Pul qazanmaq naminə onlar insanları, xüsusilə uşaqları ölümə aparan bu pis vərdişə alışdırırlar.Ona görə də bu gün narkotik ticarətə və narkomanlığa qarşı dövlət kimi, cəmiyyət də sərt təpki göstərməlidir.
Bu baxımdan, Qəbələ rayonunda bu qlobal bəlaya qarşı həm praktiki, həm də maarifləndirici tədbirlər həyata keçirilir. Belə ki, Qəbələ Rayn İcra Hakimiyyəti və Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə rayon Komissiyası, həmçinin rayon hüquq-mühafizə, təhsil, səhiyyə orqanları, Gənclər və idman idarəsi narkomanlıqla mübarizə və narkotik maddələrin qanunsuz dövriyyəsi, narkotiklərin yayılmasının qarşısının alınması ilə bağlı məqsədyönlü işlər həyata keçirmişlər. Xüsusilə rayon tam orta məktəblərində «Narkomaniya ümumbəşəri bəladır», «Övladlarımızı narkomaniyadan necə qoruyaq», «Narkomaniya müasir dövrdə cəmiyyətin üzləşdiyi ən təhlükəli ictimai hadisədir» və.s mövzularda tədbirlər keçirilmişdir. Eləcə də Təhsil İnstitutu tərəfindən «Məktəblilərin narkotik vasitələrdən qorunması yolları» və «Narkomaniyaya qarşı mübarizədə məktəb psixoloqlarının rolu» adlı metodik tövsiyələr haqqında ətraflı müzakirələr aparılmışdır.
Qəbələ rayon Gənclər və İdman İdarəsi rayon gənclər ilə 26 iyun- Narkomaniya Əleyhinə Ümumdünya Mübarizə Gününə həsr edilmiş «Narkomaniya ilə mübarizədə gənclərin rolu», «Gələcəyimizi birgə düşünək, narkomaniyaya yox deyək» mövzularında tədbirlər keçirilmişdir. Həmçinin Qəbələ Olimpiya İdman Kompleksində «Narkotikdən uzaq-idmana yaxın ol» devizi altında müxtəlif idman növləri üzrə nümunəvi çıxışlar, master- klaslar keçirilmişdir. 20 oktyabr 2022-ci il tarixdə «Narkomaniyaya yox deyək» adı altında yeniyetmələr arasında atletika idman növü üzrə kütləvi idman yarışı təşkil edilmişdir.
Qəbələ Rayon Polis Şöbəsi və komissyanın birgə təşkilatçılığı ilə rayonun orta məktəblərində, idarə və müəssisələrdə «Narkomaniya əsrin bəlasıdır» mövzusunda 15 müxtəlif maarifləndrici tədbirdə qarşıda duran vəzifələr müəyyənləşdirilmişdir. Həmçinin narkotik tərkibli bitkilərin erkən aşkarlanaraq məhv edilməsi sahəsində rayonda «Xaş-xaş» şərti adı altında kompleks tədbirlər keçirilmişdir. Hüquq-mühafizə orqanlarının və ictimaiyyət nümayəndələrinin iştirakı ilə Qəbələnin Bayramkoxalı kəndi ərazisində 4 hektar ərazidə yabanı halda bitmiş və çəkisi 4 ton olan 8000 ədəd çətənə kolları aşkar olunmaqla məhv edilmiş və müvafiq məlumatlar Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupuna təqdim edilmişdir.
Qəbələ Rayon İcra Hakimiyyəti və rayon Mədəniyyət şöbəsi tərəfindən 21 iyun 2022-ci il tarixdə Heydər Əliyev Mərkəzində «Ağ ölüm-narkomaniyaya yox deyək», 6 iyul 2022-ci il tarixdə «Narkomaniyaya qarşı birlikdə mübarizə aparaq», 29 iyun 2022-ci il tarixdə Qəbələ Dövlət Rəsm Qalareyasında «Sağlam narkotiksiz həyat seç» adlı tədbir və «Sağlam həyatı seçək» adlı rəsm sərgisi təşkil olunmuşdur. Komissiya tərəfindən keçirilən tədbirlər və narkomanlıqla mübarizə sahəsində görülmüş işlər mütəmadi olaraq Qəbələ Rayon İcra Hakimiyyətinin rəsmi internet səhifəsində yerləşdirilmiş və yerli «Qəbələ» qəzetində müntəzəm olaraq çap edilmişdir.
Qəbələ Rayon Polis Şöbəsində rayonda ərazisində aşkar edilmiş narkotik vasitələr kütləvi informasiya vasitələrinin nümayəndələrinin iştirakı ilə yandırma üsulu ilə məhv edilərək aktlar tərtib olunmuşdur. Rayonda qeydiyyatda olan narkomanlarla bağlı müalicə və reabilitasiya istiqamətində xəstələrə müasir tələblərə cavab verən tibbi xidmətin tətbiqi ilə yanaşı mövcud narkoloji xidmətin təkmilləşdirilməsi sahəsində də təşkilatı tədbirlər həyata keçirilmişdir. Rayon İcra Hakimiyyəti yanında fəaliyyət göstərən Yetkinlik yaşına çatmayanların işləri və hüquqlarının müdafiəsi üzrə komissiyaya tərəfindən gənclərin pis vərdişlərə meyil etməsi, onların asudə vaxtlarının səmərəli keçirilməsi nəzarətdə saxlanılmışdır.
Arif Allahverdiyev,
Qəbələ rayon icra hakimiyyətinin başçısının müavini