Fransanın tarixi cinayəti: Qəzzafini məhv etmək istəyib, başqa təyyarəni vurub -SENSASİON AÇIQLAMA
İtaliyanın keçmiş baş naziri Giuliano Amato (1992-1993, 2000-2001) iddia edir ki, 1983-1987-ci illərdə İtaliyanın baş naziri olmuş Bettino Kraksi o vaxtkı Liviya lideri Müəmmər Qəzzafini Fransanın onu 1980-ci ildə aradan qaldırmaq planları barədə xəbərdar edib. Amatonun özü də o dövrdə hökumət aparatının bir hissəsi olub.
Musavat.com xarici mediaya istinadla xəbər verir ki, Amatonun sözlərinə görə, “Qəzzafinin uçduğu təyyarəyə zərbə endirmək planı hazırlanıb”. Keçmiş baş nazir “La Repubblica” qəzetinə müsahibəsində deyib: “Plan çoxlu sayda təyyarənin cəlb olunduğu NATO təlimlərinin simulyasiyasını nəzərdə tuturdu. Daha sonra hadisənin bədbəxt hadisə kimi təqdim edilməsi nəzərdə tutulurdu. Bununla belə, Qəzzafi təhlükə barədə xəbərdarlıq edilib və o, öz təyyarəsinə minməyib”, – deyə keçmiş baş nazir davam edib: “Sonradan mən bildim ki, Qəzzafini İtaliya səmasında təhlükə barədə xəbərdar edən Bettino olub. O, təbii ki, belə bir həqiqətin üzə çıxmasında maraqlı deyildi: onu NATO-ya sədaqətsizlikdə və düşmənə casusluqda ittiham edərdilər”, – Amato bildirib. O, Liviyanın qırıcı təyyarəsinə atılan raketin “Itavia Douglas DC-9” sərnişin təyyarəsini vurduğunu iddia edib.
27 iyun 1980-ci ildə “Itavia” sərnişin təyyarəsinin qəzaya uğraması nəticəsində 81 nəfər həlak olub. Müntəzəm reyslə uçan təyyarə Apennin adalarının cənubundakı Ustica və Ponza adaları arasında dənizə düşüb. Amato faciəyə görə Fransa hərbi hava qüvvələrini günahlandırıb. Onun sözlərinə görə, bu, “ən inandırıcı versiyadır”. Siyasətçi isə öz sözlərinə heç bir sübut təqdim etməyib.
Bundan əvvəl Palermo məhkəməsi sərnişin təyyarəsinin qəzaya uğramasının səbəbinin başqa bir təyyarənin ona atdığı döyüş raketi ilə vurulması olduğunu təsdiqləyib.
Amatonun sözləri geniş rezonansa səbəb olub. Belə ki, İtaliyanın xarici işlər naziri Antonio Tajani deyib ki, Amato öz versiyasını ortaya qoyur. İtaliyanın baş naziri Corciya Meloni deyib ki, Amato iş üzrə materialları təqdim edərsə, səlahiyyətlilər “bütün mümkün addımları atmağa” hazır olacaqlar.
