“Təmiz Aran” layihəsi yekunlaşdı
Azərbaycan Gənclər Fondunun “İdeyanı reallaşdır 2022” fərdi qrant müsabiqəsinin qalibi Pərviz Səmədovun “Təmiz Aran” layihəsinin bağlanış mərasimi həyata keçirilib.
Azərbaycan Gənclər Fondunun maliyyə dəstəyi və “ASAN Könüllüləri” Təşkilatının təşkilatçılığı ilə təşkil olunan “Təmiz Aran” layihəsinin sonuncu günündə Ağcabədi regional “ASAN xidmət” mərkəzində bağlanış mərasimi baş tutub.
Tədbir Azərbaycan Respublikasının Dövlət Himni ilə açıq elan edilib, ardınca qardaş ölkə Türkiyədə baş verən zəlzələ nəticəsində həlak olan insanların və Şəhidlərimizin ruhu 1 dəqiqəlik sükut ilə yad olunub.
Bağlanış mərasimində Ağcabədi regional “ASAN xidmət” mərkəzinin direktoru Rəhim Qarayev, sektor müdiri Fuad Quliyev və mərkəzin əməkdaşları,Gənclər üçün Təhsil mərkəzinin Qarabağ regional Ofisinin rəhbəri Radə Telmanqızı,Gənclərin İnkişaf və Karyera Mərkəzinin Ağcabədi nümayəndəliyinin əməkdaşı Leyla Zalova, Aran Qəzetinin əməkdaşı Rəmziyyə Həsənova və layihənin iştirakçıları olan ASAN Könüllüləri və GİKM-in Gəncləri iştirak edib.
İlk olaraq qonaqlara layihə rəhbəri Pərviz Səmədov tərəfindən layihənin qısa şifahi hesabatı verilib və maraqlı anlardan ibarət videoçarx izlənilib.
Növbəti olaraq rəsmilər çıxış edib, layihə müddətində hər 3 rayondan fəallığı ilə seçilən gənclərə təşəkkürnamələr təqdim edilib.
Daha sonra isə təmizlənmiş ərazilərin əvvəl-sonra halları və iştirakçıların maraqlı anlarından ibarət foto-sərgi təqdim olunub.
Yekunda iştirakçılara çay süfərsi təşkil olunub daha sonra isə kinozalda film izlənilib.
Qeyd etmək istəyirik ki, Layihənin əsas məqsədi ətraf mühitin təmizlənilməsi, əhalinin sıx olduğu ərazilərin tullantılardan azad edilməsi və cəmiyyətimizdə ekoloji məsuliyyətin gücləndirilməsidir.
Layihə ümumilikdə 100-ə yaxın gəncin iştirakı ilə 3 regionda həyata keçirilib.
