Azər Allahverənov: Ermənistanın uzun illərdir etdiyi ekosidlər QHT-lər tərəfindən beynəlxalq tədbirlərdə gündəmə gətirilməlidir
Qarabağ Dirçəliş Fondu Qarabağda ətraf mühitə vurulmuş zərərin aradan qaldırılması və ekoloji tarazlığın bərpasına həsr olunan fikir mübadiləsi görüşü keçirib.
Media1.az xəbər verir ki, 8 oktyabr 2021-ci il tarixində Qarabağ Dirçəliş Fondu ilə ətraf mühitin mühafizəsi istiqamətində fəaliyyət göstərən qeyri-hökumət təşkilatları arasında Qarabağda ətraf mühitə vurulmuş zərərin aradan qaldırılması və ekoloji tarazlığın bərpasına həsr olunan fikir mübadiləsi görüşü keçirilib.
Görüşdə Ekologiya və Təbii Sərvətlər nazirinin müavini Vüqar Kərimov, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Azər Allahverənov, IDEA İctimai Birliyinin icraçı direktoru Surxay Şükürov, Ekologiya və Təbii Sərvətlər Nazirliyinin Ətraf mühitin və təbii sərvətlərin tənzimlənməsi şöbəsinin məsul şəxsi Murad Şahverdiyev və qeyri-hökumət təşkilatlarının nümayəndələri iştirak edib.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Azər Allahverənov tədbirdə çıxış edərək qeyd edib ki, Ermənistanın 30 il ərzində həyata keçirdiyi təcavüzkar siyasət nəticəsində ərazilərimizin təbiətinə, bioloji müxtəlifliyinə, su ehtiyatlarına, fauna və florasına ciddi ziyan vurulmuş, qiymətli sərvətlər dağıdılmış və min hektarlarla meşə sahələri qəsdən yandırılmışdır. O bildirib ki, dəymiş zərərin qiymətləndirilməsi və monitorinqi prosesində qeyri-hökumət təşkilatları aktiv olmalı, eyni zamanda müxtəlif növ sahəvi beynəlxalq tədbirlərdə Ermənistanın etdiyi ekosidləri gündəmə gətirməlidir. Sonra Azər Allahverənov ətraf mühitin mühafizəsi və ekoloji tarazlığın qorunması istiqamətində ixtisaslı ekspertlərinin yer aldığı vahid bazanın qurulmasının vacibliyini qeyd edib.
Daha sonra tədbirdə iştirak edən qeyri-hökumət təşkilatlarının nümayəndələri qeyd olunan bəndlər üzrə fikirlərini bildiriblər.
Media1.az
