Azərbaycan-Slovakiya münasibətlərində yeni mərhələ başlayır
![](https://media1.az/wp-content/uploads/2024/05/Tagi-Imamverdiyev-3-1024x1532.jpg)
Azərbaycanla sıx iqtisadi, siyasi əlaqələr qurmaq istəyən Avropa İttifaqına üzv dövlətlərin sayları artmaqdadır. Bir çox Avropa dövlətləri Azərbaycanın dost, etibarlı tərəfdaş ölkə olduğunu vurğulayırlar. Bu, ölkə başçımızın apardığı uğurlu xarici siyasətə, bütün dövlətlərin ərazi bütövlüyü və suverenliyinə hörmətlə yanaşmasına, eləcə də beynəlxalq hüququn prinsiplərinə əsaslanan siyasət həyata keçirilməsinə verilən yüksək qiymətdən irəli gəlir. Son illər Avropa İttifaqına üzv olan Slovakiya ilə Azərbaycan arasında iqtisadi, siyasi əlaqələr yüksəlməkdədir.
Slovakiya Respublikasının Baş Naziri Robert Fitsanın Azərbaycana rəsmi səfərə gəlməsi və iki ölkə arasında bir çox sahələr üzrə əməkdaşlıq haqqında sənədlərin imzalanması əlaqələrin yüksək inkişafının göstəricisidir. Prezident İlham Əliyev Slovakiya Respublikasının Baş Nazirinin ölkəmizə səfəri ilə əlaqədar mətbuata bəyanatla çıxış etdi. Çıxışında ölkə başçımız Slovakiya ilə Azərbaycan arasında siyasi, iqtisadi əlaqələrin yüksək səviyyədə olduğunu və gələcəkdə bu əlaqələrin bütün istiqamətlər üzrə daha da inkişaf etdiriləcəyini vurğuladı.
Slovakiya Respublikasının Baş Nazirinin Azərbaycana səfər etməsi iki ölkə arasında əlaqələrin yeni mərhələsinə qədəm qoydu. Azərbaycanla Slovakiya dövlətləri arasında strateji tərəfdaşlıq haqqında Bəyannamənin imzalanması əlaqələri yüksək səviyyəyə qaldırdı. Son illər həm Azərbaycanda, həm də Slovakiyada Müdafiə Sənayesi sahəsinin inkişafında böyük addımlar atılmışdır. İki dövlət arasında müdafiə sənayesində birgə istehsal sahəsinin yaradılması haqqında razılığın əldə olunması çox mühüm addımdır. Artıq 3 ildən çoxdur Azərbaycan Cənub Qaz Dəhlizi vasitəsilə 8 ölkəyə qaz ixrac edir və yaxın vaxtlarda Slovakiyaya Azərbaycan qazı nəql ediləcək. Bu da Slovakiyanın enerji təhlükəsizliyinə böyük töhfə verəcək. Ümumiyyətlə Azərbaycandan Avropaya qaz ixracı hər il artırılır. 2021-ci ildə qaz ixracı 8 milyard kub metr idisə, bu il bu rəqəm 12 milyard kub metrə çatdırılacaq. 2027-ci ilin sonuna Azərbaycandan Avropa dövlətlərinə qaz ixracı 20 milyard kub metrə çatdırılacaq. Azərbaycanın kifayət qədər qaz yataqları mövcuddur və bu imkan verir ki, qaz ixracının həcmi artırılsın. Eyni zamanda ölkəmizdə yaşıl enerji istehsalı sahəsində də böyük layihələr icra olunub və bu işlər davam etdirilir. Ölkəmizdə yaşıl enerji istehsalı təbii qaza böyük həcmdə qənaət etməyə imkan verəcək və Avropaya əlavə qaz ixracının artırılmasına da imkan yaranacaq. Işğaldan azad edilmiş Ağdam rayonunun Qərvənd kəndinin yenidən qurulmasını Slovakiya şirkəti icra edəcək. Bu Slovakiyanın Azərbaycanın ərazi bütövlüyünü və suverenliyini dəstəkləməsinin nümunəsidir. Slovakiyanın inkişaf etmiş hərbi sənaye kompleksi var və keyfiyyətli zirehli texnika, artilleriya və atıcı silahlar, habelə sursatların istehsalı və yığılması üçün əhəmiyyətli potensiala malikdir. Bakı ağır hərbi sənaye üçün Slovakiyanın təcrübəsi olan tam texnoloji bazanın yaradılmasında maraqlıdır.
Azərbaycan ərazi bütövlüyünü bərpa etməsinə baxmayaraq, hərbi potensialını gücləndirməkdə davam edir. Bunun da əsas səbəbi Ermənistanın Fransa, Hindistan və digər dövlətlər tərəfindən intensiv şəkildə silahlandırmasıdır. Bakı ilə İrəvan arasında hələ imzalanmamış sülh müqaviləsi kontekstində Ermənistanın silahlanması faktorunun özü Azərbaycanın təhlükəsizliyinə təhdid yaradır. Mümkün yeni müharibənin qarşısını almaq üçün Azərbaycan Ermənistan üzərində hərbi üstünlüyünü saxlamalıdır. Bu, Azərbaycanın daim daha güclü olmasını vacib edir. Buna görə də, Slovakiya ilə hərbi sahədə əməkdaşlıq Bakıya regionda sülhü qoruyub saxlamaq baxımından əlavə güclü amilə çevriləcək.
Tağı İmamverdiyev
YAP Ağstafa rayon təşkilatının əməkdaşı