13 İyul 2024

Xocalı qatili: “Mən hakimiyyətdə olsaydım, 2020-ci ildə müharibə başlamayacaqdı”

Ermənistanın keçmiş prezidenti Robert Köçəryan əmindir ki, Qarabağ müharibəsindən qaçmaq olardı.

Musavat.com bununla bağlı erməni mediasına istinadən xəbər verir.

Azərbaycanın uzun müddət ərzində hər şeyi planlaşdırdığını, kifayət qədər informasiya hücumu apardığını etiraf edən Köçəryanın iddiasına görə, müharibə o vaxt başlayır ki, düşmənin qələbəyə əminliyi olur. Eks-prezident qeyd edib ki, proseslərin bu şəkildə inkişafına imkan verməmək mümkün idi.

“Əgər mən hakimiyyətdə olsaydım, əminəm ki, 2020-ci ildə müharibə başlamayacaqdı”, deyə, R.Köçəryan fikirlərini davam etdirib.

O, Qarabağda baş verən cinayətlərin, o cümlədən Xocalı soyqırımının başında dayandığını “unudaraq” özünü “sülh göyərçini” kimi təqdim etməyə çalışıb. Həmçinin bildirib ki, hakimiyyətə rəhbərlik edərdisə və o halda müharibə başlayardısa, nəticə başqa cür olardı, düşmən dayandırılardı.

Beləliklə, R.Köçəryan erməni xalqının “gözünə girmək” üçün yollar axtarır. Ancaq onun nağıllarına inanan çətin ki, tapılsın.