“Xatun” qızlar ansamblının konserti uğurla başa çatıb

Naxçıvan Dövlət Universitetində İncəsənət fakültəsi, Xalq çalğı alətləri kafedrasının dosenti, sənətşünaslıq üzrə fəlsəfə doktoru Aynurə Quliyevanın rəhbərliyi ilə yaradılmış “Xatun” qızlar ansamblının konsert proqramı keçirilib. Konsertin aparıcısı Musiqinin tarixi və nəzəriyyəsi kafedrasının müəllimi Rumiyə Məmmədova Aynurə        Quliyevanın elmi pedaqoji fəaliyyəti haqqında məlumat verib. Bildirilib ki, musiqiçi ailəsində dünyaya gələn Aynurə müəllim uşaqlıqdan musiqi ilə məşğul olub, çoxsaylı konsertlərdə iştirak edib. Vurğulanıb ki, muxtar respublikada ilk dəfə  solo qanun konsertini məhz Aynurə Quliyeva verib. Bundan əlavə daha bir yeniliyi isə, muxtar respublikaya professional çoxlingli türk qanununu gətirməsidir. Diqqətə çatdırılıb ki, Aynurə Quliyevanın məhsuldar fəaliyyəti dövlətimiz tərəfindən yüksək qiymətləndirilərək 2018- ci ildə Prezident mükafatına layiq görülüb.

İncəsənət fakültəsi və Musiqi Kollecinin tələbələrindən ibarət ansamblın müşayiəti ilə  konsertdə Üzeyir Hacıbəyovun “Arşın mal alan” operettasından “Qızların xoru”, Adil Gəraylının “Baxça kürd”, Revaz Lagidzenin “Tiblisi haqqında mahnı”, Süleyman Ələsgərovun “Şalaxo”, Qəmbər Hüseynlinin “Ay işığında”, Xarici bəstəkarların əsərlərindən ibarət “Papuri”, Ələkbər Tağıyevin “Bakı gecələri”, Nazim Əliverdibəyovun “Elegiya”,  Dadaş Dadaşovun “Skertso”, Faiq Sücəddinovun “Oğrun yollar”, Fikrət Əmirovun “Böyük dayaq” kinofilmindən “Pərişanın mahnısı” tədbir iştirakçıları tərəfindən alqışlarla qarşılanıb.

Tədbirin sonunda universitetin rektoru Elbrus İsayev müəllim və tələbələrin birgə əməkdaşlığı ilə hazırlanan konserti yüksək qiymətləndirib. Universitetdə İncəsənət sahəsində yüksək inkişafın nəticəsinin göz önündə olduğunu deyən rektor bunu son illər qəbulda istedadlı tələbələrin seçilməsi və Musiqi Kollecinin də bu istiqamətdə əmək fəaliyyətləri ilə əlaqələndirib. Rektor Aynurə Quliyevanın təşəbbüsünü yüksək qiymətləndirib bu kimi tədbirlərin davamlı olmasını qeyd edib. Elbrus İsayev müəllim və tələbə heyətini  təbrik edib gələcək fəaliyyətlərində uğurlar arzulayıb.

Etibar Dərbəndəliyev,
Jurnalistika ixtisası üzrə IV kurs