NATO sammitinə HAZIRLIQ: Hakan Fidan mühüm görüşlər keçirdi
NATO xarici işlər nazirləri iyunun 24-26-da keçiriləcək sammitə hazırlıq, transatlantik əlaqələrin gücləndirilməsi və Alyansın daha güclü, daha təsirli və ədalətli yük bölgüsü olan bir təşkilata çevrilməsi məsələlərini müzakirə etmək üçün yenidən toplaşıblar.
Musavat.com xəbər verir ki, bu barədə “Anadolu” agentliyi məlumat yayıb.
NATO-nun baş katibi Mark Rutte, 3-4 aprel tarixlərində müttəfiq ölkələrin xarici işlər nazirlərinin iştirakı ilə keçirilən toplantının ikinci gününün açılışında çıxış edərək, iyunun 24-26-da Niderlandın Haaqa şəhərində baş tutacaq NATO sammitinə hazırlıqların müzakirə ediləcəyini bildirib.
Rutte iclasda Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaja Kallasın da iştirak etdiyini vurğulayaraq, “Aİ müdafiə sahəsində səylərini əhəmiyyətli dərəcədə artırır və düşünürəm ki, biz hamımız bunu məmnuniyyətlə qarşılayırıq” – deyə qeyd edib.
Aİ-nin 20 martda elan etdiyi 2030 hədəfli yeni müdafiə strategiyasını “önəmli dönüş nöqtəsi” adlandıran Rutte, “Bu planın icrasında daha sıx əməkdaşlıq etməyə hazırıq. Aİ həmçinin Ukraynaya dəstəkdə daha böyük rol oynamağı hədəfləyir” – ifadələrini işlədib.
O əlavə edib ki, Haaqa sammitində Avropa və Şimali Amerika arasındakı əlaqələrin gücləndirilməsi, NATO-nun daha güclü və təsirli bir caydırıcı qüvvəyə çevrilməsi əsas müzakirə mövzularından biri olacaq.
Ukrayna XİN rəhbəri: “Rusiyanı sülhə məcbur etməliyik”
Ukraynanın xarici işlər naziri Andrey Sibiqa toplantı çərçivəsində mətbuata açıqlama verərək, “Sülhün qarşısındakı maneə Ukrayna deyil. Biz ABŞ-ın təklifini qəbul etdik” – deyib.
Sibiqa Rusiyanın Xarkov vilayətinə pilotsuz uçuş aparatları (PUA) ilə intensiv hücumlar təşkil etdiyini bildirərək, “İndi kimin sülh, kimin isə müharibə istədiyi açıq-aydın görünür. Rusiyanı sülhə məcbur etməliyik” – ifadəsini işlədib.
Nazir NATO-Ukrayna Şurasının dünən keçirilən iclasında məhsuldar müzakirələrin aparıldığını və müttəfiqlərdən həmrəylik və dəstək mesajları aldıqlarını vurğulayıb.
Sibiqa əlavə edib ki, “Sürəti artırmağın açıq bir yolu var: ABŞ-ın iştirakı və liderliyi”.
ABŞ-dan NATO-ya yeni çağırış: Müdafiə xərcləri ÜDM-in 5%-nə qaldırılmalıdır
Donald Tramp administrasiyasının yeni dövlət katibi Marko Rubio ilk dəfə NATO toplantısında iştirak edir.
Rubio iclas girişində çıxış edərək Avropa müttəfiqlərinin müdafiə xərclərini artırmalı olduğunu və bu göstəricinin ÜDM-in 5%-nə qədər yüksəldilməsinin vacibliyini vurğulayıb.
Türkiyəni toplantıda xarici işlər naziri Hakan Fidan təmsil edir. H.Fidan dünən Marko Rubio da daxil olmaqla bir çox həmkarı ilə ikili görüşlər keçirib.
