Millət vəkili Fatma Yıldırım Bərdə terrorunun qurbanını ziyarət edib
Media1.az xəbər verir ki, Millət vəkili Fatma Yıldırım ötən il oktyabrın 28-də Bərdə şəhərində dinc əhaliyə qarşı törədilmiş erməni terroru nəticəsində yaralanmış Quliyeva Rəmziyyə Əlasdan qızını bu gün ziyarət edərək, onun qarşıdan gələn 8 Mart Beynəlxalq Qadınlar bayramını təbrik edib.
Millət vəkili Fatma xanım Yıldırım özünün facebook profilindən belə bir paylaşım edib: “ Qeyd edim ki, Rəmziyyə xanım Bərdə rayon Müalicə-Diaqnostika Mərkəzinin əməkdaşıdır, müharibə dövründə öz vəzifəsini layiqincə yerinə yetirərək əsgərlərimizin yanında olub. O, Bərdəyə terror hücumu zamanı iş yerində olub, xəstəxananın önünə düşmüş raket zərbələri nəticəsində çox ağır yaralanıb. Hal-hazırda onun müalicəsi Bakıda, Azərbaycan Tibb Universitetinin Tədris Cərrahiyyə Klinikasında davam etdirilir. Rəmziyə xanımın müalicəsi nəzarətimizdədir, onun vəziyyəti ilə daim maraqlanırıq. Klinikanın rəhbərliyinə, həkim kollektivinə, xüsusi ilə doktor Rövşən Xəlilzadəyə zəhmətlərinə görə dərin minnətdarlığımı bildirirəm.”-deyə millət vəkili bildirib.
Millət vəkili paylaşdığı postda “Əziz Rəmziyyə xanımı və onun simasında Bərdə rayonunda yaşayan bütün xanımları 8 Mart Beynəlxalq Qadınlar Günü münasibətilə ürəkdən təbrik edirəm!”-deyə bayram təbriki ünvanlayıb.
