Bərdə rayon Bəcirəvan kəndindən olan şəhid ailəsi ziyarət olunub

Bərdə Regional Mədəniyyət İdarəsinin rəisi Vəsilə Möhsümova Bərdə rayon Bəcirəvan kəndindən olan Vətən müharibəsi şəhidi İsmayılzadə Şövqi Yaqub oğlunun ailəsi ilə görüşüb.

Regional idarənin rəisi Vəsilə Möhsümova şəhidin ailəsi ilə söhbət apararaq onun keçdiyi şərəfli döyüş yolundan, Vətən müharibəsində Azərbaycan Ordusunun göstərdiyi igidlik və şücaətdən, xalqımızın birliyindən, şanlı 44 günlük savaşda Azərbaycan Ordusunun düşmənə sarsıdıcı zərbələr vuraraq məğlub etməsindən, dövlət tərəfindən şəhid ailələrinə göstərilən diqqət və qayğıdan danışıb.

Şəhid Şövqi İsmayılzadə 1996-cı il fevralın 23-də Bərdə rayonunun Bəcirəvan kəndində anadan olub. Azərbaycan Ordusunun əsgəri olan Şövqi İsmayılzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə savaşıb. Şövqi İsmayılzadə oktyabrın 8-də Suqovuşan döyüşləri zamanı şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Şövqi İsmayılzadə ölümündən sonra “Vətən uğrunda” medalı ilə təltif edilib.