Amerika Erməni Milli Komitəsi ABŞ -ın Bakıdakı səfirinə hücuma keçdi!
![](https://media1.az/wp-content/uploads/2021/01/52687b617341f47264c6911e756c9785.jpg)
ABŞ -dakı erməni lobbisinin ittihamı: “ABŞ-ın Bakıdakı səfiri Azərbaycanın təcavüzünü toy-bayram edir”
ABŞ-ın Azərbaycandakı səfiri Earle Litzenberger Azərbaycanı “ərazi bütövlüyünü bərpa etdiyi” üçün təbrik edib və ABŞ-ın müharibədən sonra Bakının nəzarəti altına keçən ərazilərdə bərpa işlərində iştirak etməyə hazır olduğunu bildirib. Çərşənbə günü mətbuat üçün yayımlanan açıqlamaya görə, cənab Litzenberger bu sözləri Azərbaycanın iqtisadiyyat naziri Mikayıl Cabbarovla görüşü zamanı söyləyib.
Səfir Amerika şirkətlərinin yenidənqurma işlərində, xüsusən də su ehtiyatlarının idarə olunması, yol və digər infrastruktur layihələrində, rəqəmsal və informasiya texnologiyaları sahələrində Azərbaycanla əməkdaşlıqda iştirak etməyə hazır olduğunu bəyan edib. Bu barədə Azərbaycan mətbuatına istinadən Ermənistanın “asbarez.com” saytı xəbər yayıb.
Sayt bildirir ki, Amerika səfirinin “Azərbaycanın işğalçılıq siyasətini toy-bayram etməsi Amerika Erməni Milli Komitəsi tərəfindən şiddətli qınaqla üzləşib”.
“Bakıdakı səfirimiz (ABŞ) Azərbaycanın təcavüzünü bayram edir. Daha da pisi odur ki, amerikalıları yerli erməni torpaqlarının ticari istismarına cəlb etmək istəyirlər. Bu barədə əldə etdiyimiz təsdiqlənməmiş məlumatlar bizi narahat edir”, Amerika Erməni Milli Komitəsinin İcraçı direktoru Aram Hamparianın yaydığı bəyanatda belə deyilir.
![ANCA's Aram Hamparian Toasts the Expanding U.S.-Armenia Relationship - YouTube](https://i.ytimg.com/vi/9l3UQR6ioaY/maxresdefault.jpg)
Aram Hamparian
Səfir Litzenbergerdən izahat tələb edən Amerika Erməni Milli Komitəsi “Artsaq torpaqlarını ələ keçirən Azərbaycan”ın həyata keçirmək istədiyi layihələrə Amerika tərəfindən sərmayə qoymasına etiraz edir.
Bu məsələ son dərəcə önəmlidir. Çünki Amerika Erməni Milli Komitəsi əmin idi ki, Co Bayden administrasiyası Cənubi Qafqazda birmənalı şəkildə ermənilərin mövqeyindən çıxış edəcək. Ermənilər ona da ümid edirdilər ki, ermənilərə dəstək məqsədi ilə ABŞ tezliklə Türkiyə və Azərbaycana qarşı sanksiyalara əl atacaq.
![U.S. Ambassador to Azerbaijan Earle Litzenberger meets with Azerbaijan's Economy Minister Mikayil Jabbarov](http://asbarez.com/wp-content/uploads/2021/01/gn_8z_ewwvsuo8a-droalpzmpon1scxa.jpg)
Ancaq ABŞ-ın Bakıdakı səfirinin İqtisadiyyat Nazirliyindəki görüşü və orada səsləndirdiyi fikirlər onu deməyə əsas verir ki, yeni administrasiya da Azərbaycana xüsusi önəm verir. ABŞ-ın Azərbaycandakı səlahiyyətli səfirinin bu açıqlamaları həmin önəmin ilkin etirafı kimi dəyərləndirilməlidir.
Elbəyi Həsənli, Sürix
U.S. Ambassador to Baku Congratulates Azerbaijan for ‘Restoring Territorial Integrity’ | Asbarez.com