Ağstafada Aprel döyüşləri ilə əlaqədar tədbir keçirilib
05 aprel 2023-cü il tarixində Aprel döyüşləri ilə əlaqədar Ağstafa Dövlət Rəsm Qalereyasında “Aprel döyüşləri – böyük zəfərin başlanğıcı” mövzusunda tədbir keçirilib.
Tədbirdə YAP Ağstafa rayon təşkilatının, Ağstafa Rəsm Qalereyasının, Ağstafa şəhər 1 saylı tam orta məktəbin əməkdaşları və müharibə veteranları iştirak ediblər.
İlk öncə Ulu öndər Heydər Əliyevin və torpaqlarımızın işğaldan azad edilməsi uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan “Mədəniyyət şöbəsi” ərazi partiya təşkilatının sədri Gülgün Kərimov çıxışı zamanı Aprel döyüşlərinin Azərbaycan Ordusunun qələbəsi ilə nəticələndiyini vurğulayıb.
Tədbirdə çıxış edən YAP Ağstafa rayon təşkilatının məsləhətçisi Tağı İmamverdiyev, Ağstafa şəhər 1 saylı tam orta məktəbin direktoru Ramiz Nəsirov, Ağstafa Rəsm Qalereyasının kiçik elmi işçisi Vüsalə Musayeva və müharibə veteranları Azərbaycan Ordusunun 2016-cı ilin aprelində qazandığı qələbənin böyük tarixi əhəmiyyətə malik olmasından geniş bəhs ediblər. Qeyd olunub ki, Aprel döyüşləri bütün dünyaya Azərbaycan Ordusunun gücünü, qələbə əzmini göstərib. Ali Baş Komandan cənab İlham Əliyevin rəhbərliyi altında “Dördgünlük müharibə” adı ilə tarixə düşən Aprel döyüşləri hər bir Azərbaycan vətəndaşının hərbi vətənpərvərlik ruhunu daha da yüksəldib.
