Bərdənin Mustafaağalı məktəbində şəhidlərin xatirəsi yad edilib
Dekabrın 13-də, yəni bu gün Bərdə rayon Göyüş Qarayev adına Mustafaağalı kənd tam orta məktəbində şəhid Göyüş Qarayev və Mübariz Muradovun doğum gününə həsr olunmuş tədbir təşkil edilib.
Məktəbin müəlliməsi Gülidə Əliyeva Media1.az-a bildirib ki, hər iki şəhidin ad günü yaxın tarixlərə təsadüf edir. Şəhid Göyüş Qarayev 15 dekabr 1970-ci ildə, şəhid Mübariz Muradov isə 13 dekabr 1976-cı ildə dünyaya gəliblər. Ona görə də hər iki şəhidin doğum günü hər il eyni tarixdə qeyd edilir.
Tədbirdə Azərbaycan Respublikasının ərazi bütövlüyü uğrunda canından keçən şəhidlərin xatirəsi sükutla yad edilib, Dövlət Himni səsləndirilib. Məktəblilərin hazırladığı şerlər oxunub.
Onu da qeyd edək ki, şəhid Göyüş Qarayev 1994-cü ilin 26 yanvarında Cəbrayıl rayonunun Cocuq Mərcanlı kəndinin müdafiəsi zamanı , şəhid Mübariz Muradov isə 1995-ci ilin 27 dekabrında Murovdağ bölgəsində xidməti borcunu yerinə yetirərkən şəhidlik zirvəsinə ucalmışlar.
