Qisası alınan Xocalı: Faciənin 29-cu ildönümü fərqli keçiriləcək

Sabah, fevralın 26-da Ermənistanın azərbaycanlılara qarşı törətdiyi Xocalı soyqırımının 29-cu ildönümüdür. Bununla əlaqədar anım tədbirinin təşkili üçün dövlət qurumları tərəfindən bütün təşkilati işlər tamamlanıb, sabah vətəndaşlar kütləvi şəkildə “Ana harayı” abidəsini ziyarət edəcəklər.

Lakin bu gün də abidəni ziyarət edib, Xocalı qurbanlarının ruhuna dualar oxuyanların sayı az deyildi. Qeyd edək ki, xalqımız ilk dəfə qisası alınmış Xocalının anım tədbirini həyata keçirir. İnsanlarımız Xocalı qatillərini məhv etmiş qalib xalq kimi bu dəfə başqa bir əhval-ruhiyyə ilə ziyarətə gələcək. Təşkilati işlər də məhz bu ruhda həyata keçirilib.

Xətai Rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov Musavat.com-a müsahibəsində bildirdi ki, soyqırımla əlaqədar anım tədbirinin keçirilməsi üçün rayon ərazisi və “Ana harayı” abidəsinin ətrafı tam hazırlığa gətirilib. Onun sözlərinə görə, ziyarət zamanı pandemiyanın şərtlərinə uyğun olaraq bütün normalar qorunacaq.

Sabahkı tədbirlə əlaqədar yollarda təhlükəsizliyin təmin olunması, o cümlədən koronavirus pandemiyası ilə əlaqədar ziyarətçilərin təhlükəsiz hərəkəti ilə bağlı Bakı Şəhər Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov da Musavat.com-a danışıb.

Xatırladaq ki, Xocalı faciəsi tarixin ən qanlı cinayətlərdən biridir. Aylarla mühasirədə saxlanılan Xocalı şəhəri 1992-ci il fevralın 25-dən 26-na keçən gecə erməni cinayətkarları və onların havadarları tərəfindən yerlə-yeksan edilib,dinc sakinlərə qarşı amansız cinayətlər törədilib, soyqırım aparılıb.

63-ü uşaq, 106-sı qadın, 70-i qoca olmaqla 613 nəfər qətlə yetirilib, 1275 nəfər girov götürülüb. Soyqırım nəticəsində 8 ailə tamamilə yox edilib, 25 uşaq hər iki valideynini, 130 uşaq isə valideynlərindən birini itirib. Girov götürülülənlərdən 197-sinin taleyi hələ də məlum deyil.

Bu qeydlərin daha təfsilatlı məzmununu video reportajımızdan izləyə bilərsiz.

Alim Liftiyev
Elçin Əkbərov
Musavat.com