Təhsil, elm, tədqiqat və dəstək layihələrinin maliyyələşdirilməsi üçün sənəd qəbuluna başlanılıb – FOTO
Fevralın 17-dən etibarən mikro, kiçik və orta sahibkarlığın inkişafı üçün təhsil, elm, tədqiqat və dəstək layihələrinin maliyyələşdirilməsi ilə bağlı Kiçik və Orta Biznesin İnkişafı Agentliyi (KOBİA) tərəfindən elan edilmiş müsabiqəyə sənədlərin qəbuluna başlanılıb.
Bu barədə Azərbaycan Respublikasının Kiçik və Orta Biznesin İnkişafı Agentliyi məlumat yayıb.
Bildirilib ki, müsabiqə ilə bağlı sahibkarlıq subyektlərinin məlumatlandırılması və onları maraqlandıran sualların cavablandırılması üçün KOBİA tərəfindən məlumatlandırıcı vebinar keçirilib. 150-yə yaxın KOB subyektinin iştirakı ilə təşkil olunmuş vebinarda KOBİA-nın əməkdaşları Natiq Heydərov və Elməddin Hacıyev tərəfindən müsabiqənin şərtləri və layihələrin qiymətləndirilməsi prosesi barədə təqdimat keçirilib, KOB subyektlərinin çoxsaylı sualları cavablandırılıb. Məlumat verilib ki, Nazirlər Kabinetinin 30 sentyabr 2020-ci il tarixli Qərarı ilə təsdiq edilmiş qaydalara uyğun olaraq müsabiqədə mikro, kiçik və orta sahibkarlıq subyektinə aid olan hüquqi və fiziki şəxslər iştirak edə bilərlər. Müsabiqəyə KOB-ların inkişafı üçün təhsil, elm, tədqiqat və dəstək istiqamətlərində layihələr təqdim oluna bilər. Hər bir şəxs müsabiqəyə yalnız 1 layihə təqdim edə bilər. Layihələrin icra müddəti 3 aydan az, 12 aydan çox olmamalıdır. Digər qurumlar tərəfindən tam maliyyələşdirilmiş, icrası davam edən və ya başa çatmış layihələr Agentlik tərəfindən əlavə olaraq və ya təkrar maliyyələşdirilə bilməz. Hər bir layihə üzrə maliyyələşdirmə məbləği maksimum 20 min manat həcmindədir.
Müsabiqədə iştirak etmək istəyən KOB subyektləri müvafiq ərizə, layihə və büdcənin əsaslandırılması üçün nümunəvi formaları, eləcə də digər məlumatları Agentliyin saytında bu məqsədlə yaradılmış xüsusi bölmədən əldə edə bilərlər. Müsabiqəyə sənədlər birbaşa və ya elektron formada təqdim oluna bilər. Sənəd qəbulu martın 18-dək davam edəcək. Müsabiqənin nəticələri isə 19 aprel 2021-ci il tarixindən sonra KOBİA-nın rəsmi internet səhifəsində (www.smb.gov.az) yerləşdiriləcək.
Vebinar zamanı müsabiqəyə təqdim ediləcək müvafiq sənədlərin hazırlanması üçün Agentliyin KOB inkişafı mərkəzləri (KOBİM-lər) tərəfindən KOB subyektlərinə köməklik göstəriləcəyi bildirilib. Belə ki, müsabiqəyə təqdim ediləcək sənədlərin hazırlanması prosesində dəstəyə ehtiyacı olan KOB subyektləri KOBİM-lərin ödənişsiz informasiya, məsləhət və təlim xidmətlərindən faydalana bilərlər.
Qeyd edək ki, müsabiqəyə təqdim olunacaq layihələrin qiymtələndirilməsi zamanı layihənin mikro, kiçik və orta sahibkarlığın inkişafına təsiri, innovativliyi, əsaslandırılmış ideyasının olması, praktiki məqsədlər üçün tətbiq imkanları, layihənin həyata keçirilməsi üçün tələb olunan müvafiq maddi-texniki bazanın mövcudluğu və digər bu kimi amillər əsas götürüləcəkdir.
