Azay Quliyev: “Qarabağ erməniləri özlərində cəsarət tapıb bir araya gəlsinlər və …”
“Bu gün Qarabağda yaşayan bir qrup erməni sakini könüllü və öz iradələri çərçivəsində sərbəst hərəkət etmək (freedom of movement) hüququndan istifadə etməyə başlayıblar”.
Musavat.com xəbər verir ki, bu sözləri millət vəkili Azay Quliyev deyib.
O qeyd edib ki, Azərbaycan sərhədçiləri onların Laçın nəzarət-buraxılış məntəqəsindən təhlükəsiz, maneəsiz və sivil qaydada keçmələrini təmin edib:
“Biz Qarabağ ermənilərinin məsuliyyətli vətəndaş kimi Azərbaycanın qanunları ilə yaşamaq və yaxud başqa yaşamaq yeri seçmək kimi alternativlərdən faydalanmaq hüququna hörmətlə yanaşırıq. Çünki dünyada hər bir şəxsin yaşamaq üçün yer seçmək hüququ universal hüquqdur və bu hüquqa beynəlxalq və milli qanunvericilikdə tam təminat verilir.
Azərbaycan Konstitusiyanın Azadlıq hüququ adlı 28-ci maddəsinin III yarım bəndində deyilir: ” Qanuni surətdə Azərbaycan Respublikasının ərazisində olan hər kəs sərbəst hərəkət edə bilər, özünə yaşayış yeri seçə bilər və Azərbaycan Respublikasının ərazisindən kənara gedə bilər”.
Bu gün bir qrup erməni sakininin bu hüquqdan istifadə etməsi ona açıq işarədir ki, rəsmi İrəvanın BMT Təhlükəsizlik Şurasında üzləşdiyi fiaskonu görən Qarabağ erməniləri Ermənistanın və onun Xankəndində yaratdığı oyuncaq xunta rejiminin girovluğunda bundan sonra qalmaq və onların oynadıqları ucuz oyunun alətinə çevrilmək istəmirlər. Bu reallığı nəhayət, dərk etmək Qarabağ erməniləri üçün irəliyə doğru atılmış müsbət addımdır.
Digər bir müsbət addım isə o olardı ki, sağlam düşüncəli Qarabağ erməniləri özlərində cəsarət tapıb bir araya gəlsinlər və Azərbaycanın qanunları çərçivəsində reinteqrasiya prosesində fəal iştirak etməyə hazır olduqlarını bəyan etsinlər. Belə bir sağlam yanaşma yalnız və yalnız ermənilərin maraqlarına, onların vaxt itirmədən normal və qanuni şəkildə Azərbaycanda yaşamalarına xidmət etmiş olardı.
Reinteqrasiyanın alternativi yoxdur və bu proses tezlliklə öz məntiqi sonluğuna çatacaq!”.
