8 noyabr – Zəfər Günü!

Azərbaycan Respublikasının Prezidenti cənab İlham Əliyevin 3 dekabr 2020-ci il tarixli sərəncamı ilə hər ilİn 8 noyabrı Zəfər Günü kimi qeyd ediləcək!

Bu sadəcə torpaqlarımızın işğaldan azad olunduğu tarix deyil. Bu illər,  öncə bütöv bir xalqın,  Azərbaycan xalqının özünütəsdiq günüdür!

Nə az, nə çox,  düz 30 ildir ki, vicdanımızda ağır yüklə, qəlbimizdə acıyla, düşüncəmizdə qisasla yaşayırdıq.

Bütün bu illər ərzində bir ümidlə, bir arzuyla yaşadıq: “Gün o gün olsun ki, Qarabağımıza qayıdaq!”

Amma təkcə arzulamaqla kifayətlənmədik. Ümidimizi, intiqam istəyini, inamımızı bir an belə itirmədik. Həmişə qayıdış ümidiylə, Vətən torpaqlarını işğaldan azad etmək əzmiylə, Qələbə günü həsrətiylə yaşadıq. Bilirdik ki, o gün gələcək! O gün ki, biz bir xalq olaraq doğma torpaqlarımızı yağı tapdağından təmizləyəcəyik, doğma ellərimizə-obalarımıza dönəciyik, Vətənin müdafiəsi uğrunda canından keçmiş şəhidlərimizin qanı yerdə qalmayacaq!  

Nəhayət ki, həmin gün gəldi!

2020-ci il sentyabrın 27-də növbəti erməni təxribatını dəf etmək üçün Azərbaycan ordusunun başladığı əməliyyat azadlıq yürüşünə çevrildi. Nə xoşbəxtik ki, ağıllı, qətiyyətli sərkərdənin, güclü, çevik ordunun, qələbə əzmiylə azadlıq yürüşümüzə qoşulan və bu yolda canını belə əsirgəməyən igid oğulların sayəsində Vətən torpaqlarımız cəmi 44 gün ərzində düşməndən təmizləndi. Qürur ünvanımız, mədəniyyət beşiyimiz sayılan Şuşamız 2020-ci il 8 noyabr tarixində sözün əsl mənasında qürurverici fədakarlıq və cəsarətlə işğaldan azad edildi, əsl sahibinə – Azərbaycan xalqına qaytarılıdı! Uğur ardınca uğur qazanmaqda davam edən ordumuzun və xalqın haqq səsini dünyaya bəyan edən Ali Baş Komandan cənab İlham Əliyevin cəsarəti, qətiyyəti erməniləri diz çökməyə, imdad diləməyə məcbur etdi. Şuşanın azad olunmasından cəmi iki gün sonra – 10 noyabr tarixində ermənilər təslim aktına imza atmalı oldular.

Belə bir gün gəldi. Həsrətini çəkdiyimiz, arzusuyla, xəyalıyla yaşadığımız Qələbə Günü! Var olsun belə bir xoşbəxtliyi bizə yaşadan rəşadətli Azərbaycan Ordusu, müzəffər Ali Baş Komandan!

Azərbaycan Ordusu şərəflə mübarizə apardı. Vətən torpaqları yağı düşməndən qarış-qarış, kənd-kənd təmizləndi. 44 gün ərzində 5 şəhər, 4 qəsəbə, 286 kənd, çoxsaylı strateji yüksəkliklər işğaldan azad olundu, Silahlı Qüvvələrimiz Cəbrayıl, Qubadlı, Zəngilan, Füzuli rayonlarını, Xocavəndin böyük hissəsini, Laçın rayonunun kəndlərini işğaldan azad etdi. Uzun illərdən sonra doğma torpaqlarımızda yenidən üçrəngli şanlı bayrağımız ucaldıldı.

Məlumdur ki, müharibə qansız-qadasız, Qələbə qurbansız olmur. 44 gün ərzində 3000 nəfərə qədər şəhid verdi Azərbaycan xalqı. Bir-birindən cəsarətli, bir-birindən şərəfli igid oğullarımızın qanı, canı bahasına qazanıldı bu Qələbə! Şəhidlik zirvəsinə yüksələn minlərlə igid anasının, yar-yoldaşının gözü yaşlı qaldı. Ən böyük təsəllimiz isə, əlbəttə ki, Qələbədir, Vətənin işğaldan azad edilməsidir!

Qələbə uğrunda mübarizədə təkcə Ordumuz deyil bütün Azərbaycan xalqının, o cümlədən Azərbaycan Respublikası Ədliyyə işçilərinin də xidməti oldu. Onsuz da illər boyu Azərbaycan Respublikasının Ədliyyə Nazirliyi Ermənistanın ölkəmizə təcavüzü, yürütdüyü işğalçılıq siyasəti barədə dəfələrlə BMT Təhlükəsizlik Şurası, Avropa Şurasının Parlament Assambleyası və digər beynəlxalq təşkilatlara müraciətlər etmiş, ədalətsizliyə son qoyulmasına çağırışlar səsləndirilmişdir. Ən önəmlisi ədliyyə və məhkəmə orqanlarının 100-dək əməkdaşı könüllü olaraq hərbi xidmətə yollandı və  Vətənin azadlığı uğrunda yüksək vətənpərvərlik nümunəsi göstərdilər. Döyüşlərdə iştirak edən əməkdaşlarımız arasında təəssüf ki, yaralanan və şəhid olanlar da vardır. Əlbəttə ki, onların hər biri biz Ədliyyə işçilərinin həm də qürur ünvanıdır.  Şəhidlərimizin ailələri bütün xalqa, ilk növbədə isə biz həmkarlarına müqəddəs əmanətdir. Qazilərimizin sağlamlığının bərpası üçün Ədliyyə Nazirliyi bütün zəruri addımları atmaqdadır.

Qələbə hər bir azərbaycanlı kimi həm də biz ədliyyə işçilərinin qarşısında yeni vəzifələr sərgiləmişdir. Hazırda nazirlik tərəfindən Azərbaycan həqiqətlərinin təbliği və geniş yayılması məqsədilə “Qarabağ Azərbaycandır!” elektron məlumat platforması (http://justice.gov.az/categories/1148) yaradılıb. İşğaldan azad olmuş ərazilərdə həyatın yenidən canlanmasında peşəkar fəaliyyət göstərmək üçün Ədliyyə Nazirliyinin rəhbər işçiləri və aidiyyətli məsul şəxslərindən ibarət Qərargah yaradılmış, həmçinin yeni Qarabağ regional ədliyyə idarəsi təsis olunmuşdur.

Görüləcək işlər hələ çoxdur. Ancaq qalib xalqın övladları olaraq, hər birimiz gecəli-gündüzlü çalışaraq Azərbaycanımızın dilbər guşəsi olan Qarabağı və işğaldan azad olmuş digər əraziləri dirçəltməyə, yenidən canlandırmağa böyük şövqlə başlamışıq. Axı bu bizim illərdir arzumuzdur. Bizi bu arzumuza yetirdiyi üçün Ali Baş Komandan cənab İlham Əliyevə, müzəffər Azərbaycan Ordusuna ömrümüz boyunca minnətdarıq.

İnşallah, hər ilin 8 noyabr tarixində şanlı Zəfər Günümüzü qeyd edəcəyik. Bu qələbə şəhidlərin canı bahasına, xalqn birliyi hesabına və güclü sərkərdənin adil rəhbərliyi sayəsində ərsəyə gəlib. Odur ki, Zəfər Günü bizim haqqımızdır!

Zəfər Günün mübarək Azərbaycan!    

Elşən Quliyev- Ədliyyə Nazirliyinin Yevlax rayon Qeydiyyat şöbəsinin rəisi